Eu m'escondise, dompna, que mal non mier
De so que·us ant de mi dich lausengier;
Per merec·us prec qu'om non puosca mesclar
Lo vostre cors fin, leial, vertadier,
Humil e franc, cortes e plazentier
Ab mi, dompna,
per messongas comtar.
Al primier get perd' eu mon esparvier,
Que·l m'aucion el ponh falcon lainier
E porton l'en, qu'ieu·l lor veia plumar,
S'ieu non am mais de vos lo cossirier
Que de nulh' autra aver lo desirier,
Que·m don
s'amor ni·m retenha al colgar.
Autr' escondich vos farai plus sobrier,
E no mi puosc orar plus d'encombrier:
S'ieu anc falhi vas vos neis del pensar,
Quan serem sol en cambra o dinz vergier,
Falha·m poders davas mon companhier
De tal guisa que no·m
posca aiudar.
S'ieu per jogar m'asset pres del taulier,
Ja no·i puosca baratar un denier,
Ni ab “ taula presa ” non puosca intrar,
Anz get ades lo reir-azar derrier,
S'ieu autra dompna mais deman ni enquier
Mas vos,
cui am e desir e tenh car.
Senher sia eu de castel parsonier,
Si qu'en la tor siam catre parier
E l'us l'autre no·ns poscam ja amar,
Anz m'aion ops totz temps arbalestier,
Metg’ e sirven e gaitas e portier,
S'ieu anc aic cor d'autra dompna
amar.
Ma dompna·m lais per autre cavalier
E pois, non sai a que, m'aia mestier;
E falha·m vens, quan serai sobre mar;
En cort de rei mi batan li portier;
Et en cocha fassa·l fugir premier,
Si non menti cel
que·us anet comtar.
Escut al col cavale ieu ab tempier
E port sallat capairon traversier
E renhas breus qu'om no puesc' alonguar
Et estreups loncs en caval bas, trotier;
Et a l'ostal truep irat l'ostalier,
Si no·us menti qui·us
o anet comtar.
Dompna, s'ieu ai mon austor anedier
Bel e mudat, ben prenden e mainier,
Que tot auzel puosca apoderar:
Sinh'e grua et aigron blanc e nier,
Volrai lo donc mal mudat, gallinier,
Gort, debaten, que non puosca volar.
Fals enveios fementit lausengier,
Pois ab midonz m'avetz mes destorbier,
Ben lausera que·m laissessetz estar.
