Olivier de La Marche (1426-1502)
Recueil : Le Chevalier Délibéré (1483)

Le Chevalier Délibéré


 

TABLE DES MATIERES


I - Cy commence le chevalier deliberé compregnant la mort du duc de borgoigne qui trespassa devant nansy en lorraine.

II - Comment l'hermite entendement monstre ses reliques a l'acteur. Et luy devise des oeuvres de messire accidant et de son pouoir.

III - Cy se combat l'acteur a l'encontre de aage Et quant l'acteur se rendit prisonnier.

IV - Comment l'acteur c'est forvoyé et est venu devant le palays d'amours, ou desir vouloit qu'il entrast. Mais souvenir l'en destourna. Et de ses adventures.

V - Cy monstre fresche memoire a l'acteur les sepultures des anciens trespassez. Et par les escriptures voit ceulx qui ont esté desconfitz par debile ou par accident.

VI - Cy devise de la bataille faicte entre debile et le duc philippe de bourgoigne.

VII - Comment le duc charles de bourgoigne combatit messire accident.

VIII - Comment accident combatit la duchesse d'ostriche, et elle vaincue l'acteur se voulut presenter pour faire son devoir Et comment atropos l'envoya contremander par respit son herault.

IX - Comment freche memoire ramaine l'acteur en sa maison et luy devise en chemin de ses nouvelles.

X - Comment entendement enseigne l'acteur a se conduire en fait d'armes et comment il se doit armer et parer.

 

 

 


I - Cy commence le chevalier deliberé compregnant la mort du duc de borgoigne qui trespassa devant nansy en lorraine.

Ainsi que a l'arriere saison
Tant de mes jours que de l'annee
Je partis hors de ma maison
Par une soubdaine achoison
Seul a par moy plain de pensee
Qui m'acompaigna la journee
Et me vint en remembrance
Le premier temps de mon enfance

Celle qui moult estoit m'amye
Print ung propos de verité
Et me dit celuy qui s'oublye
Fuit honneur et cy l'ame nuye
Je le tiens pour desherité
Soit d'avoir ou de la santé
Du despoir de grace divine
Que chacun n'est pas d'avoir digne

Tu vois pour la saison passee
Arbres terre et tout herbage
L'un tout vert l'autre sans ramee
Fleur et odeur toute est cassee
Plus n'est fueille ne fruit n'ombrage
Tout tend a froideur et a neige
Tout est nect sans nulle vigueur
Et n'est plus seye ne chaleur

Ainsi est de toy clerement
Qui le prin temps de ton enfance
As despendu entierement
Et jeunesse pareillement
Mis tes euvres en deffaillance
Et si n'a pas telle esperance
Que ont les arbres pour reverdir
Car jamais ne peux revenir

Dois je oublyer ou que soye
Ce traicté qui tant point et mort
Que fist ayme de montgesoye
Plus riche que d'or ne de soye
Au merveilleux pas de la mort
Sçavoir fault qui est le plus fort
De toy, accidant ou debile
Chacun d'eulx en a tué mille

Ces deux chevaliers trescrueux
En la grant forest attroppos
Tiennent le pas trop perilleux
Treshorrible tresmerveilleux
Sans avoir jour ne nuyt repos
Et continuant leur propos
De tant combatre et de ferir
Qu'ilz feront tout homme mourir

Messire accidant le terrible
Fournit les jeunes et les fors
Et debile le treshorrible
Met a fin par coups invisibles
Ceulx dont la vigueur en est hors
Ilz font du cueur tous effors
Leurs meurtres sont si a doubter
Que nul ne les peut eschapper

Scez tu pas bien que le herault
T'a pieça noncé leurs chapitres
Tu scez que poyse et que vault
Accidant t'a livré l'assault
Tu as ouy de ses epistres
Il est temps que tu te chapitres
Car tu as touché a l'emprise
Depuis ta primiere chemise

Es tu plus fort que n'est sanson
Ou a craindre que herculés
Plus saige que n'est salomon
Plus beau que le grant absalon
Plus subtil que dyomedés
N'as tu paour quant tu penses des
Que ceulx n'ont peu les coups rabatre
De ceulx qui te convient combatre

Plus vis et plus le temps approche
Qui te convient en champ entrer
Tu sens desja ung fert qui losche
Maladie sonne la closche
En lieu de trompette sonner
Qui te semond de toy armer
Et de deffendre ta querelle
Contre la bataille mortelle

Ainsi pensif si m'en hortoit
De ce que me fut necessaire
Dont la merciay bien estroit
Et luy dis puis qu'il fault qu'i soit
Je feray ce que je dois faire
Lors je prins mon harnois de guerre
Et comme ung chevalier vaillant
M'armay et montay tout errant

Mon cheval s'appelloit vouloir
Et mon harnois je fis tremper
D'eaue qu'on appelle pouoir
Mon escu fut de bon espoir
Au moins pour longuement durer
Mon glaive fut de avanturer
Fait par ung merveilleux ouvraige
Et mon espee de couraige

Ainsi j'entreprins la conqueste
De mes adversaires doubtez
Et me mis tout seulet en queste
En suyvant la matiere honneste
Des bons chevaliers trespassez
Et chevauchay deux jours passez
Avant que trouvasse advanture
Digne de mettre en escripture

Il n'est besoing que je racompte
Mes sejours et mes reposees
Mais raison est que je vous compte
Les adventures de ce compte
Telles que je les ay trouvees
Droit a la fin des deux journees
Je m'esbatoye en ung plaine
Qu'on nommoit plaisance mondaine

Je prins en ce lieu tel plaisir
Et m'a greoit tant la contree
Que je n'en pouoye partir
Mais ains que peusse despartir
J'ay adventure rencontree
Qui venoit du long d'une pree
Qui m'escria de me garder
Et qui me convenoit jouster

Je luy respondis amy cher
Du moins a ma premiere jouste
Dictes moy se estes chevalier
Vostre nom et de quel quartier
Vous estes dit or escoute
A qui qu'il poise ne qui couste
J'ay nom hutin qui tout brise
Le propre filz de gourmandise

Comme dis si n'estes vous pas
Debile ou messire accidant
Qui tiennent d'attroppos le pas
Quant je vous vis venir le pas
Je le cuiday appartement
Il dit que non certainement
Mais qu'il estoit de leur mesgnie
Premier percecuteur de vie

Lors baissa sa lance ferree
D'un fert qu'on nomme peu de sens
Et fiert en ma targe doree
Tel cop et de telle boutee
Que encore certes m'en sens
Et moy acoup a luy j'entens
Couchay ma lance cy a point
Que nulz de nous ne faillit point

La furent noz lances brisees
Mais nous gardasmes les arsons
Et mismes les mains aux espees
Toutes de folies trampeez
Et donnasmes grans horions
La frappasmes sur chapperons
D'estoc de traver et de taille
Comme chevaliers en bataille

Mais hutin faisoit vaillamment
Et me livroit forte bataille
De cops d'estocz d'eschauffemens
Courir sallir refroidissemens
Par son espee qui bien taille
Et me fut advenu sans faille
Quant la vint une damoiselle
La journee m'estoit mortelle

La damoiselle qui survint
Ce fut reliques de jeunesse
Qui resceut des cops plus de vingt
Sur ung grant tergon qu'elle tint
Par sa bonté et gentillesse
Tant exploicta que fut maistresse
au tournay que je vous veulx dire
Ou je congnuz avoir du pire

Jeunesse pour nous despartir
Dit sire hutin souffrez tant
Adventurer me fait venir
Ce chevalier errant querir
Pour veoir du monde plaisant
Hutin respond je suis content
Plus loing portera son escu
Plus tost se trouvera vaincu

Mais pour memoire de sa paine
Je luy donne de ma livree
Une barrette de mygraine
Car de telle vertu est plaine
Qu'elle sera ronouvellee
Chacune lune de l'annee
Ce present hutin me laissa
Et picque cheval et s'en va

Ainsi je portay cest assault
Par ce qu'il me fit demourer
De jeunesse qui beaucop vault
Mais je la perdis en sursault
Dont je me trouvay desolé
Si me partis tout asseullé
Et prins une petite voye
Sans sçavoir en quel lieu j'aloye

Quant hutin se fut desparty
Et jeunesse s'en fut allee
Je me trouvay en tel party
Qu'a peine pouoye partir
Du champ ne de celle valee
Ne sçay ou jeunesse est allee
Mais je me trouvay le matin
En ung couvent d'un jacopin

Je cheminay le plain chemin
Ayant pensee et souvenir
Qu'il me fist d'armes pelerin
Sans vouloir partir au butin
Des peines qu'i me fault souffir
Et droit au point du jour faillir
J'aperceuz de loing ung hermite
A l'huys de sa maison petite

Si me tiray droit celle part
Et luy dis se dieu vous dont joye
Pource qu'il est meshuy bien tard
Me ferez vous de voz biens part
Ainsi que pour vous je feroye
Il me dit que bien venu soye
Et traicta moy et mon cheval
Comme ung amy especial

Luy mesmes cy me desarma
Et me logea en son hostel
Et d'un grant mantel m'affeubla
Que pourveance luy donna
Qui fut de soye riche et bel
Oncques mais je n'euz hoste tel
Car chere me fist de hait
Que je fuz logié a souhait

Sy fit a toute diligence
De l'eaue necte apporter
Par ung jeune filz d'apparence
Que on appelloit bonne enfance
Ainsi le ouys je nommer
Puis me voult mon hoste mener
En une petite chappelle
Moult devote plaisant et belle

La je fis ma devocion
Devant l'autel qui fut paré
D'un drap de satisfaction
Armoyé de contriction
Penitence l'avoit ouvré
L'ermite ma cecy monstré
Par ung gracieulx exemplaire
Car sans ce je ne puis bien faire

Il me pria que j'abregeasse
Mais oraysons pour celle foys
Puis me mena en une place
Ou il luy pleut que je soupasse
Avecques luy comme courtois
Il y avoit du lard et des poys
Et d'autres biens cy largement
Que je devoye estre content

Souvent mes yeulx en regettoye
Vers mon hoste pour veoir la geste
Et certes plus le regardoye
Tant plus voulentiers le veoye
Car son maintien estoit honneste
Blanche fut sa barbe et sa teste
Homme de bel et grant corsaige
Et ressembloit bien estre saige

Je ne me peuz oncques tenir
Que son nom ne luy demandasse
Luy priant par son bon plaisir
Mais qu'il n'en eust point desplaisir
Que son nom de luy emportasse
Il le m'accorda de sa grace
Disant je vous congnois assez
Et veulx bien que me congnoissez

J'ay travaillé moult longuement
Chevalier errant par le monde
Et suis nommé entendement
Mon nom est congneu plainement
Des meilleurs de la table ronde
Mais veant que ce n'est que une unde
De mer de la vie incertaine
J'ay fait de ce lieu mon demaine

Mon pain est moulu de sobresse
Mon vin trampé de bonne vie
Mon repas se fait en liesse
Suffisance est ma maistresse
J'ay repos sans melencolie
Ceans ne peut entrer envie
Et s'appelle ceste maison
La demourance de raison

Droit cy veulx je vivre et morir
Droit cy veulx je mes jours passer
Querir dieu le monde fuyr
Servir l'ame et le corps suyr
Qui m'a fait trop plaisir aymer
Riens ne m'est que peché amer
Sy prie la vierge d'excellence
Qu'elle me donne pascience

La chevalerie ne desprise
Ton nom ton cas et ton emprinse
Riens ne voult que l'on se desguise
Je voy et sçay tout que je y vise
J'ay par memoire lotz en marche
Ou que l'on tire ne ou que l'on marche
Ou fortune douleur et raige
Ont entreprins de faire raige

Or t'ay de ton nom devisé
ce que en veult maintenant dire
Et sçay que tu as proposé
Com hardy vaillant et osé
De livrer ton corps a martire
Devant ceulx que nulz de nature
Ne peult en nulz aages passez
Mais ont tous murtris et cassez

Accidant est tousjours surbout
Tout prest a cheval et armé
Pour tuer et affoler tout
Et debile tient l'autre bout
Cruel sans mercy ne pitié
Mais pour ung qui aura passé
La ou debile prent sa rente
Accidant en a tué trente

Je t'ay declairé ton affaire
Ton nom ton vouloir et ton cas
Riens ny vault fouyr ne retraire
Il te fault ton emprinse faire
Va te presenter a ce pas
Assez d'honneur tu conquerras
Et feras oultrageusement
Se tu vainq messire accidant

Et affin que soyes plus digne
De soustenir ceste adventure
Toy donner ung dun je m'encline
D'un glaive frere de regime
En lieu de la lance rompue
De ce pousse fier frappe et rue
Car par ce tu rebouteras
Accidant la ou tu vouldras

Pource dois a ton reveillier
Toy signer de la bonne main
Priant a dieu vouloir veiller
A ton bon ange travailler
Pour toy en ce voyage humain
Dont je prie le roy souverain
Et luy rens grace de bon cueur
Des biens dont il nous est donneur

(Ainsi nous levasmes de table)
Aprés graces a grant loysir
Et trouvay mon hoste notable
A son propos tant agreable
Que g'y prenoye grant plaisir
Il me dit vous yrés dormir
Et demain je vous monstreray
Toutes les reliques que j'ay

Lors me mena pour moy loger
En ung lieu paré a propos
Sy gentement que a souhayter
Il me fil couvrir et coucher
Sur ung materat de repos
Oncques mais si bon logis n'os
Ne lieu de plus plaisant sesjour
Sy m'en dormis jusques au jour

Grant heure fut quant m'esveillay
Et ouys sonner la clochette
Pour quoy a haste me levay
Me vestis et mes mains lavay
Honteux par negligence faicte
La messe trouvay toute preste
Q'un cordelier de l'observance
Chanta qu'on nomme obedience

L'aube dont il eut revesture
Estoit de bonne voulenté
L'amyt fut tissu par mesure
Le saint fut de chasteté pure
L'estolle fut de charité
Le manipule de loyaulté
Et le chasuble par maistrie
Fut pourtraicté de preudommie

L'autel fut de bonne et vraye foy
Et le calice de creance
Les chauetes de bonne foy
Et la lumiere quant a soy
Fut de grace signifiance
Le benoistier fut attrempance
La cloche fut entendement
Toute de bon enhortement

Toutes les nappes des autelz
Se monstroient par grant richesse
Oncques n'en avoys veuz de telz
De verité sont ouvragez
Le messel estoit de prouesse
Oncquesmais ne vis tel noblesse
Ne lieu ou dieu fust mieulx servy
Je le louay quant je le vy

La paix fut faicte d'union
Les chandeliers tous de concorde
Le marbre de perfection
Aussi de bonne intention
Les verrieres quant le recorde
Si furent de misericorde
Par tout tresrichement paree
La saincte chappelle sacree

Apres la messe celebree
Mon hoste qui eut adoré
Devotement la matinee
Me donna la bonne journee
Et me enquist doulx et privé
Comme j'auoye reposé
Je luy dis bien et me louoye
Du logis que par luy j'avoye

Lors me dit il fault que je tienne
Promesse d'ouvrir mon tresor
Il m'est force que je tienne
Et que des pieces me souvienne
Qui ne sont ne d'argent ne d'or
L'huys ouvryt qui fut de remort
La clef fut desir de sçavoir
Et la sarrure d'un miroir

Ce lieu fut ung cloistre longuet
Paré d'estranges pourtraictures
Or pensez se je fis bon guet
Pour sçavoir de ce lieu que c'est
Et mieulx congnoistre les figures
Entendement fist ces droictures
Et me dist entens et appliques
Et tu congnoistras mes reliques

 

 

II - Comment l'hermite entendement monstre ses reliques a l'acteur. Et luy devise des oeuvres de messire accidant et de son pouoir.


Voyez sy le soc d'une charue
Dont accidant abel occist
Par cayn tout de sa main nue
Et par une envie advenue
Celluy premier la terre ouvrit
Dont il fist mal et si meffist
Car il meurdrit chacun le juge
L'un des bons avant le deluge

Ce pillier d'extre grosseur
Est celluy que sanson ploya
Dont il abatist par virgueur
Le grant palays et sa haulteur
Pour sa femme qu'on maria
Il s'occist et moult en tua
Ce fut accidant le terrible
prouvé au teste de la bible

Voyez cy chemise enfumee
Dont dyamus si n'en peult mais
Cuydant aymer et estre aymee
Occist et brusla en la pree
Le preux et vaillant hercules
Accidant fist ses entremetz
Lyre le pourrez en mains lieux
En la nativité des dieux

En cest estuy trouverez mys
Les greffez de quoy fut tué
Cesar par esperés amys
Qui l'ont en leur senat occis:
Par marveilleuse cruaulté
Accidant a ce coup heurté
Ces choses si nous sont certaines
Selon les hystoires rommaines

Ceste bouette te veulx monstrer
Sans y advenir ou toucher
Antipater la fist ouvrer
A tenir poisons et porter
Pour alixandre despeschier
Accidant ouvra du mestier
Et fut mort et empoisonné
Du monde le plus ronommé

Ce grant fust affin qu'on le voye
C'est la lance dont archillés
Tua le preux hector de troye
Le plus a craindre dont on oye
Le plus vaillant qui fut jamais
Telz sont d'accidant les droitz metz
De ce fait plaine mencion
De troye la destruction

De cest arc et traict bien aguz
Fut occis et mys a la mort
Achilles par ung grant mesuz
Au devot temple de venus
Par paris qui fist cest effort
Accidant y besongna fort
Et fist finer par sa rudesse
Le plus vaillant qui fust de grece

Celle espee qui la fait giste
C'est celle dont mourut pompee
Par le desloyal roy d'egypte
Qui l'occist en lieu de merite
Et luy a la teste couppee
Accidant fut a celle armee
Qui desfist le pillier et l'homme
Soustenant du pillier de romme

Voyez la l'aneau envenimé
Ou print hanibal de cartaige
Le fort venim dessaisonné
Dont mesmes c'est emprisonné
Avant qu'il eust tiers ne quart aage
Accidant mesla ce bruvaige
Dont mourut l'un des vaillans princes
Qui oncques gouvernast provinces

Voyes aprés le glaive tresfort
Dont le roy marc de cornouaille
Navra lachement a la mort
Tristan dont il eut villain tort
Et fut deshonneste bataille
Accidant ne fist pas la faille
D'occire l'ystoire le fonde
L'un des bons chevalliers du monde

De cest espieu trenchant et bon
Fist occire comme traistresse
Jadis le roy agamenon
La femme du mauvais renon
De son paillart par subtillesse
Ce roy conduisoit hors de grece
Et sa femme traistreusement
Le fist mourir par accident

De ce branc desir inhumain
Occist mordrech remply de mal
Le roy artus son souverain
Et aussy messire gauvain
Nompas comme ung hardy vassal
Mais par ung aguet desloyal
Dont accident fut conducteur
Sur deux princes de grant valeur

De badelere la bonté
Fut ja oloferne le grant
Par judich a la mort bouté
Dont elle sauva la cité
Et de l'arme et du tyrant
Accident heurta bien avant
Quant par la main d'une pucelle
Mist amours en euvre mortelle

De ce clou et de ce martel
Occist jabel la femme honneste
zizaran le tyrant cruel
Ce coup fut divin et moult bel
Quant ce clou luy mist en la teste
Le peuple de dieu en fist feste
Accident faisoit telz deluges
Prouvez par livre des juges

De ces deux glaves par excés
Ce sont deux freres entre occis
Pour ce que ja ethioclés
Ne voulut rendre a polmicés
Le regne qui luy eut promys
Accident s'est au debat mys
Les escriptures en sont plaines
Es fais de thebes et d'athenes

De cest aultre espieu remondin
Tua son bon oncle fremont
Cuidant ferir par le serin
Ung sanglier qui livroit hutin
En l'espés du boys et parfont
Cest accident regreta moult
Lyre le peulx je le t'assigne
En l'advenement melusine

Ce sanglier mist a la mort seure
Le bel adous en sa jeunesse
Qui de chasser print si grant cure
Qu'il mist son corps a l'adventure
Contre le conseil de la deesse
La fist accident grant rudesse
Car il deffit les amourettes
Des dames selon les poetes

De celle grant dague affilee
Navra jacob et par embas
Amazin en une accollee
Dont il a la vie finee
Ce fust bien le baiser judas
La fist ung ort et villain cas
Accident faisoit telz desroys
Comme on lyt au livre des roys

Ce cailleau celle fronde a latz
Sont ceulx dont david par couraige
Occist le geant goleas
Qui de mal faire ne fut las
Ne a luy ne a son lignaige
Accident acheva ce gaige
Qui se fiert par divers moyens
Sur catholicques et payens

De ce chevestre fut pendu
Aman tant riche tant puissant
Pour ce qu'il avoit pretendu
A faire destruit et perdu
Le peuple juif paravant
Dont hester qui vertu eut tant
Le fist d'accidant estrangler
Et mardocheus honnorer

Je n'eu pas vesité le quart
De celluy qui fist a noter
Que l'on nous dist qu'il estoit tart
Si feismes de ce lieu depart
Et me voult mon hoste emmener
Entendement me fist muser
Es reliques qu'il me monstra
Ou ung tresmerveilleux monstre a

Ainsi nous partismes tous deux
Hors du cloistre de souvenance
Ou je prins plaisir douloureus
Ung appre soulas angoisseux
Et ung delit en desplaisance
C'est ung doubter en asseurance
C'est une seurté incertaine
Dont je ne fuz pas sans grant peine

Touteffois moult marry je fuz
Et beaucoup je le regretoye
Que je ne veiz tout le surplus
Et oultre je m'esbahys plus
De ce que riens veu je n'avoye
En ce cloistre dont je venoye
Des fais de debile le fier
Ce cas me faisoit merveillier

Mais entendement me saoulla
Me disant si a moy reviens
Le surplus te demonstrera
Et de debile on te dira
Dont il fiert ne de quelz engins
Ses bastons ne sont terriens
Mais fait de foiblesse massue
Dont mesmes le porteur se tue

Ainsy ce propos nous laissasmes
Sy prins mes armes et m'armay
Des biens de leans desjunasmes
Dismes a dieu nous embrassasmes
Sa grant bonté luy merciay
Promettre me fist et fait l'ay
Que par la refferoy passaige
Se je reschappe du voyage

Lors j'ay ma lance demandee
Aprés que je fus a cheval
Que le preudomme m'eut donnee
De regime bien ordonné
Contre la force de tout mal
Sy prins mon chemin par ung val
Qui se tiroit en une lande
Qui me sembloit estre bien grande

Ceste lande que j'ay nommee
Rappelloit en vulgal le temps
Combien qu'elle fust grande et lee
Si est elle tantost passee
Quant plaisir y est sur les rens
On y court comme font les vens
La j'aperceu pour abregier
Que temps se passe de legier

Mon cheval qu'on nomme vouloir
Tiroit en ce lieu tant au frain
Que je n'euz de tenir pouoir
Que subit ne fusse pour voir
Droit au milieu de beau plain
La subit je voys tout plain
Ung chevallier qui m'attendoit
Et que combatre me failloit

Il estoit armer de travail
Et son cheval s'appelloit peine
Son escu paroit au ciel
Paint de veiller et de sommeil
Si caduc qu'on le veit a peine
Sa cotte fut de souffrir peine
Et sembloit a le voir sans faille
Qu'il venist d'une grant bataille

J'eusse voulentiers regardé
La contance de partie
Mais possible ne m'a esté
Semblant que fusse destinee
D'esprouver sa chevallerie
Je couchay il ne faillyt mye
Et telz heurtasme noz escuz
Que tous deux fusmes abatuz

Et luy qui fut bon chevallier
Saillyt sus sans faire demeure
Si feiz je de l'autre quartier
Il empoigne son branc d'assier
Pour moy fierement courrir seure
Ma lance que je congneuz seure
De regime qu'on me fist prendre
Mis en mes mains pour me deffendre

Aprés son escu prent et joint
Pour moy assommer et confondre
Je le reboute par tel point
Deux ou trois foys sy bien appoint
Qu'il trouva bien a qui respondre
Vaillamment me savoit respondre
Et de ma part me defendoye
Le mieulx que faire lo pouoye

Mais il me rassailloit tousjours
Et me donnoit de son espee
Qui fut faicte de trop de jours
De si grans coups et de si lours
Que j'en eu la teste estonnee
Ma lance si fut tronçonnee
Par la force de moy deffendre
Et convint mon espee prendre

Tant fut cest assault combatu
Que nul de nous n'eust la pel seine
Froissasmes haubert et escu
Se l'un fiert l'autre l'a randu
Chascun a vaincre met sa peine
Dont pour reprendre nostre halaine
Nous retirasmes d'un accord
Et le vouloit bien le plus fort

Quant j'euz mon halaine reprinse
Je regarday mon adversaire
Que je crains beaucoup et le prise
Sy me mys ung peu en devise
Disant vassal de grant affaire
Je vous prie que vueillés tant faire
Pour moy de vostre nom me dire
Et je vous emprie beau sire

Sy me dist d'asseuree voix
Doulcement et de bon visaige
Noble et suis yssu des roys
Avant perceval le galloys
Congneu par mon grant vasselage
Sachez que nommé suis aage
De renconter prest et commun
Au milieu du tamps de chacun

Nul ne peult le temps trespasser
Qu'il ne passe par mes destroitz
Tel ne scet l'aage nommer
Qu'il ne me vouldroit pas trouver.
Mais il abuse ses explois
Par moy fault passer une foys
Tel est le chemin des euurex
Ou mourir jeune douleureux

Et puis que tu es en mes mains
Savoir te fault que je sçay faire
Prisonnier te rendras du moins
Je te deffye et ne te crains
Deffens toy il t'est necessaire
Il saulx avant sans moy retraire
Et recommença nostre estour
Le plus felon de tout le jour

 

 


III - Cy se combat l'acteur a l'encontre de aage Et quant l'acteur se rendit prisonnier.

Mainteffois le glayve qu'il eut
Me porta ce jour mains contraire
Et puis regime rompu fut
Qui mortellement me deceut
Et me greva en cest affaire
Car pour moy oultrer et deffaire
Espour dont fut fait mon escu
Me fut lors des poings abatu

Quant aage me eut desarmé
De mon bon escu d'esperance
Il s'est du tout abandonné
Pour ce qu'il me sentoit foulé
Et affoibly en ma puissance
Et ne voys autre recouvrance
Pour eschapper de ce dangier
Que de me rendre prisonnier

Lors me rendiz rescoux ou non
A aage par son grant vouloir
Et luy promys foy et prison
Asseurant de payer rançon
De son desir a mon pouoir
Doulcement me voult recevoir
En prenant mon gantellet dextre
Comme mon vaincueur et mon maistre

Puis me dist qu'il me traicteroit
En prison moult courtoisement
Mais tenir foy me convenoit
Et faire ce qu'il me diroit
Sur peine de parjurement
En commandant estroictement
Plusieurs choses dont il me charge
Qui ne m'est pas petite charge

Premier en la terre amoureuse
Ne te mesle point somme toute
La est plaisance doloreuse
Doulce savveur trop venimeuse
Et n'a pas sens qui n'y fait doubte
On m'y hait je n'y ayme goute
Aage n'est plus en amour chier
Pour ce te deffens ce quartier

Et puis au val de mariage
Ne vueille point que tu traverse
C'est ung tresperilleux passaige
Mal y sont venus gens de aage
C'est terre pour toy trop diverse
aussy ne veult que tu converse
Plus es dances ny es carolles
Dont tient oysance les escolles

Aussy je te deffens les cours
Des princes et des grant seigneurs
La sont perilz et mains faulx tours
Jeunes gens ilz quierent le cours
Pour querir proffitz et honneurs
Mais il en revient plusieurs
Par la sente de mal vueillance
Povres d'amys et de chevance

En la forest de temps perdu
Ne va plus mettre tes desduys
Tu as trop longuement vescu
Pour plus chasser a l'espardu
En partes de jour et de nuyt
Le lieu me desplaist et je y nuys
a mettre a proffit ton temps veille
En ce point aage te conseille

Joustes, tournoys, jeu de traveil
Te sont d'eux mesmes deffendus
Tous les matins a ton resveil
Penses et fais ton appareil
affin que soient combatus
Ceulx qui tant d'autre ont vaincus
Ton corps pour avanturer en ce lieu
Et garde l'ame pour ton dieu

Or t'ay ordonné les limites
Que je ne veulx point que tu passes
A me croire beacoup proffites
Du rebours tu te desherites
Et pers de vertu la grace
Si dis ne doubte que je face
Riens contre ce que j'ay juré
Mais tiendray foy et verité

Puis me dit qui m'eslargissoit
Affin de tenir ma promesse
Et me conseilla et vouloit
Que je prinse ma voye droite
Parmy le desert de vieillesse
C'est le chemin la seure adresse
Selon la raison de nature
Pour attandre mon adventure

Chevaulx et armes me rendit
De sa liberalle franchise
Et en prenant congié me dit
Je te donne pour ton proffit
Ce gorgerin fait de tel guise
Qui est meslé de barbe grise
Faicte de nature si franche
Que plus vivras plus sera blanche

Doncques aage me donna
Le present de barbe meslee
Je partis et il demoura
A garder ce don charge a
C'est le temps en celle contree
Ainsi j'ay la face tournee
Vers viellesse qu'on veult fuyr
Et si la devroit on querir

Ainsi la montaigne montay
Que l'on peult le my temps comprendre
Mais certes la je desvallay
Beacoup plus tost que je ne l'ay
Plus poise monter que descendre
Et me fallut tirer et tendre
Contre vieillesse le desert
Que chacun destruit et desert

Mais je n'euz gaires cheminé
Que droit a ung chemin croysé
Me suis ainsi que oublié
Hors de la voye destourné
(Que aage m'avoit enseigné)
Le santier que l'on nomme abus
Si prins comme mal conseillé
Ou plusieurs se tiennent abus

Le chemin me sembla tout vert
Et si estoit saison faillie
Le pays bel et descouvert
Fueilles et fleurs tout y appert
Abus est restaurant de vie
La je rentray en fantasie
Des haulx plaisirs de mon jouvent
Et oubliay le demourant

Lors me ressaillit souvenance
De tout mon jeune temps perdu
Vieiliesse fut en oubliance
Prison serment obligence
Plus n'en fut en riens souvenu
Il fut tout nouvel revenu
Du temps certes que je cuidoye
Avoir ce que je souhaitoye

Armes, armures, chiens, oyseaulx
Tout fut submis a mon plaisir
La fis en espaigne chasteaulx
Et de chardons souvent chappeaulx
Tout conquis sans riens retenir
Abus me faisoit reverdir
Et croire de moy l'impossible
Par sa devoyance nuysible

Je ne tins puis bride ne frain
Mon cheval s'en alloit sa voye
Plus ne vis montaigne ne plain
Je fut du cuyder si tresplain
Que je ne me recongnoissoye
Ou je alloye je ne savoye
Abus me macha celle oublye
Ainsi chemine qui s'oublye

Tant ay cheminé et arré
Par la sente peu de prouffit
Sans congnoistre que j'ay arré
Que subit me suis embarré
Ou plus bel lieu qu'oncques dieu fit
La ung palais eut fait et fit
Le plus bel qu'on pourroit choisir
Et sembloit lieu pour non morir

Les carneaux estoint d'or fin
Flambans contre le soleil
Les murs sont d'argent metallin
Les fenestres de cristallin
Et le comble dont m'esmerveil
Fut couvert d'un ambre vermeil
Qui rendoit clarté et lueur
Si grant qu'on ne soit la valeur

Les fenestres furent parees
De dames et damoyselles
Si tresrichement aornees
Qu'oncquesmais ne furent trouvees
En banquet ne festes plus belles
Et pour entretenir icelles
Mains gorgias et bien en point
En ce lieu ne failloient point

Trompettes menestriers sonnoient
Sy hault que tout redondissoit
L'un chantoit les autres dansoient
En plusieurs lieux se deduisoient
chascun du mieulx qui peut faisoit
abus en ce lieu me tenoit
Qui me sembloit se estre pouoye
Que bonne adventure y auroye

Si m'adressay vers le portier
Que l'on nommoit abusion
Et luy diz tresdoulx amy chier
De palays si grant et si chier
Qui n'a point de comparaison
Vueillez moy nommer la maison
Si me respondit a motz cours
Que c'estoit le palays d'amours

 

 


IV - Comment l'acteur c'est forvoyé et est venu devant le palays d'amours, ou desir vouloit qu'il entrast. Mais souvenir l'en destourna. Et de ses adventures.

Lors me retire ung peu arriere
Car d'amour je fus rebouté
Mais desir vint a la barriere
Qui me faisoit perdre maniere
Et moy d'aller moult fort tempté
Souvenir si m'a deschanter
Qui m'escria que je faisoye
Et si parjurer me vouloye

Et me bouta devant mes yeulx
Le mirouer des choses passees
Ou je veiz aage le vieulx
Qui me poursuyvoit en tous lieux
Par la foy que luy eu juree
Et si veiz toute figuree
Ma barbe paincte de meslure
Qui m'esbahyt a desmesure

Desir si me print par la bride
Me voult en amours remettre
Mais souvenir si me dist ridez
Fuiz ce lieu vieillart plain de ridez
Il te fault une aultre commettre
Jamais n'estudie tel lettre
Cul et con te fault renoncier
Car plus ne vaulx pour le mestier

Quant j'euz bien pensé a mon cas
Combien que me temptast desir
Pour le mieux je ne le creu pas
Mais luy dis tu m'excuseras
Et me feras ung grant plaisir
Si l'on me vouloit poursuyvir
Pour estre d'amours retenu
Si diz que tu ne m'as pas veu

Et combien que desir mist peine
De me rebouter en la nasse
D'amours souvenir bien a peine
Me revint en voye plus saine
En m'eslongnant de celle place
Abuz je laissay et sa trasse
Et prins la sante bon advis
Qui tost m'a en mon chemin mis

Si diz a dieu amours et celle
A qui mon service donnay
Qui vouldra que je la decelle
Des belles du monde est la belle
Tant de vertuz ailleurs veu n'ay
Elle valoit et je l'aymay
Dieu scet a quelle fin tendoye
Le celler point ne le pourroye

En ce point je tournay le dos
A amours et a sa sequelle
Rentrant a mon premier propos
Pour ce qu'en tout tenir luy volz
Ma foy et sonner ma sequelle
Et fut mon aventure telle
Qu'en viellesse je me trouvay
Trop plus tost que je ne cuiday

Le chemin y estoit tremblant
Et plain de parfondes ruelles
L'eau fut bruyneuse et suyvant
Rendant flair infect et puant
La ne croist fruit que de misere
La terre ne prouffitte guere
Les rentes par toutes valeur
Ne se payent que de langueurs

Les arbres y sont tous steriles
Et ne portent ne fleurs ne fruyt
Les fueilles sont seiches et viles
Les arbres y sont inutiles
En ce que medicine instrir
Brief c'est ung pays si destruyt
Qu'il n'est vivre qu'on y congnoisse
Fors seullement poires d'angoisse

La sont fontaines d'amertumes
Et ruisseaulx courans de souffrettes
La ne rend point clarté la lune
Le soleil n'y luyst ne alume
La sont les tenebres apertes
Regretz de biens et dures pertes
Sont les piteux plains et les chants
Qu'on y oyt par bois et et par champs

Vieillesse est travaillant demaine
Plus y siet on, mains on repose
En vieillesse n'a heure saine
Maladie l'a en son regne
Santé en est du tout forclose
Lyesse la ne vient ne ose
Par la dure melancolie
Qui regne sur celle partie

Pres de la en voye petite
Si est une isle d'enfermeté
Que l'en dit le lieu decrepite
C'est une demeure mauldicte
Plaine de grant adversité
Je n'y ay pas encor esté
Mais bien pres me voy de sentir
L'air du lieu qui me fait fermir

On ne va pas en decrepite
Faire seulement demurance
Car elle vient et si habite
Dont le corps jusques en est quitte
De l'ame qui vit en souffrance
Vieillesse revient en enfance
Par la douleur de ce martir
Qu'on ne peult nombrer ne escripre

J'entens bien que moult est a craindre
De decrepite la demure
Mais qu'il peult a ce attaindre
Le grant purgatoire ce est maindre
Se paciance la demeure
Je prie a dieu ains que je meure
Que la je face penitance
Qui me soit a l'ame allegance

Quand je me veiz en celle nasse
De vieillesse la ou j'estoye
Je ne choisy trou ne place
Pour m'eslongner de celle trace
S'en decrepite je n'entroy
En ce point je m'entretenoye
Le moins mal qui me fut possible
En vieillesse tres terrible

La congneuz des gens une mer
Faire diverses mommeries
L'un veult ses ans dissimuler
Par soy de mistions laver
Et raire ses barbes fleuries
Autres faisoient par tromperies
Taindre leurs cheveulx et parrucques
Par aage blanches et caduques

Mais vieillesse ne peult mentir
Ne mesconter a son pouoir
Nature ne peult reverdir
Tel meshain ne se peult guerir
La ne vault charme ne savoir
Et si n'est riens plus lait a veoir
Que l'yssue de telz mysteres
A remplir tous les cymiteres

Or nous tairons de ce propos
C'est langaige melancolique
Je ne trouve sentiers ne trotz
A mon yssir car je ne potz
La me faillyt ma rethorique
Je leuz en la leçons antique
Vieillesse m'a print a souffrir
Douleur qui ne pourroit guerir

Si fais comme l'oysel qui chante
Enclos en sa petite caige
Combien que le cueur se lamente
Pour la prison qui le tourmente
Dont il quiert yssue et passaige
Toutesfois il se ressouaige
Et chante par le souvenir
Qu'il a de son passé plaisir

Aussy je me resjouyssoye
En ma vieillesse ou je me vey
Et en mes faitz passez pensoye
L'un me fist dueil et l'autre joye
Le temps ne fut pas tout uny
A corps recreu et cueur failly
Je visite celle contree
Ou j'ay grant merveille trouvee

Car en telle place sterile
J'ay trouvé ung quartier de terre
Le plus riche le plus fertile
Le meillieur et le plus utile
Qui soit d'icy en angleterre
Plus plaisant lieu nul n'eust sceu querre
La eut ung manoir en closture
Qu'on appelloit bonne aventure

Et peut a plusieurs gens sembler
Qu'en vieillesse n'a point de joye
Si a je le veulx bien monstrer
Mais il fault en l'estude entrer
Et apprendre par toute voye
Comme se mourir ne devoye
Et telle vie maintenir
Que l'en veult selon dieu mourir

Telle est la leçon de sagesse
Tel est l'effect des vertueux
Ce sont les moyens que viellesse
Demande pour puor lyesse
Ce sert aux jeunes et aux vieulx
Rien n'est tant melancolieux
Que faiz de peché et de blasme
A cil qu'il approuche la lame

Les murs de ce manoir petit
Dont moult m'agreoit l'apparence
Furent massonnes par delit
Et qui moult ce lieu embellit
Le portal fut plain de plaisance
Les fossez pour plus d'asseurance
Furent taillez parfondement
De la main de bon pancement

Le comble fut d'estudier
Le fenestraige d'acquerir
Et le pont fut de labourer
La porte fut de souvenir
Au dessus pour mieulx resplandir
Et grans banieres de plaisir
Qui faisoient a chacun entendre
Que ce lieu fut fait pour aprandre

Oyseuse si en fut bannye
Labeur si ce nommoit portier
La ne peut entrer villennye
Mais on y veult bien jalousie
Pour mieulx le temps emploier
Le passe temps pour abreger
De ce lieu se le veulx sçavoir
N'est que d'aprendre et sçavoir

Se euz desir de la entrer
Et de congnoistre le demeure
Il ne le fault pas demander
Je laissay cheval pasturer
Et vins au portier sans demeure
Disant amy en la bonne heure
Donnez moy ceans entree
Pour congnoistre ceste contree

Le portier me fut ung peu rude
Et me dit ayés pascience
Ce n'est pas icy une begude
C'est le lieu qui s'appelle estude
Le droit ennemy d'ignorance
Sy est le tresor de science
C'est la richesse de la terre
Autre avoir ne deveroit on querre

Ce lieu garde une princesse
La plus belle que on peut veoir
Dieu la fit par telle noblesse
Que jamais ne perdra jeunesse
Sans amaindrir ne main ne soir
Mouvoir ne peut ne n'a point hoir
Son nom est a chacun notoire
Et appelle on franche memoire

C'est tout le plaisir et soulas
Qu'en vieillesse trouver se peut
D'elle on ne peut estre las
Qui ne la quiert il en dit las
Et m'esmerveille se on la veult
Celle la vouldra qu'elle ne veult
Memoire c'est par adventure
L'un des secretz de creature

Vray est que nature le coffre
Donne ou memoire se trouve
Par l'ame qui vie acoffre
Par porcion et se encoffre
Pour quoy memoire naist et euvre
C'est doncques l'ame qui requeuvre
Qui dit fy ou nature cesse
doncques dieu a fait ma maistresse

Puisque ma maistresse est faicte
De dieu le maistre des ouvraiges
Sy digne chose cy parfaicte
Doit estre acquise et atraie
Et honoree par les saiges
Et doit toucher en ces langaiges
Homme qu'en vieillesse se treuve
Quant de memoire y la requevre

Et quoy qu'elle se tient muree
C'est moy labeur qui l'ay trouvee
Par l'estude que j'ay hantee
J'en ay les clefz je l'ay gardee
Nul sans vertu ne la verra
Qui memoire veoir vouldra
Apprendre fault et retenir
Et ruminer le souvenir

Mais affin que tu te conforte
En la viellesse ou je te voy
Qui est demeure dure et forte
Ouvrir je te veulx ceste porte
Va a ma dame je l'ottroy
Labeur qui a pitié de moy
M'a mis en ce noble chastel
Qui valloit ung riche chastel

Fresche memoire promptement
M'a bonté et doulceur monstree
Car elle me vint au devant
Et me receut benignement
Par bonne façon asseuree
Elle c'estoit ce jour paree
D'un drap figuré a penser
Moult merveilleux a regarder

Je vis au drap qui fut bien beau
Entrelassé d'or et de soye
Du vieulx testament et nouveau
Et sur son chef eut ung chappeau
Qui me plaisoit quant le veoye
Une odeur que je sentoye
Qu'il appelloit ramentevoir
La se tient l'oyr et sçavoir

Je luy priay par courtoysie
Veoir ces livres de valeur
Mais pourtant ne le fist il mye
Et me dit que qui estudie
Leans il soit duyt et asseur
D'apprendre sa leçon par cueur
Car memoire n'a autre livre
Que tel qui souvent luy livre

Peu proffite l'estudier
A ceulx qui en vieillesse sont
Mais se doyvent enseigner
Penser et rememorer
Ce qu'ilz ont aprins et veu ont
Ces choses au cueur joye font
Pource dis moy qu'il te plaira
Et memoire te servira

Quant j'ouyz la dame parler
Si doulcement et par tel guise
Je me prins a reconforter
Disant je vous dois honnorer
Quant par vous puis avoir aprise
Pour parvenir a mon emprise
Savoir ne veulx aultre science
Car ou le grief gist le cueur pense

Je cours je vois je m'achemine
Contre la forest d'atropos
Ce souvenir me print et myne
Car il me fault ains que je fine
Combatre pour abregier motz
Contre deux chevaliers de l'ostz
L'un d'eulx est messire accident
L'autre debile le tirant

Je demanday si par hystoires
Par legendes ou par croniques
Par escriptures ou memoires
Ou par souvenirs transitoires
Par subtilité ou practiques
Est il rien mys en faitz antiques
Des deux chevalliers si dessus
S'ilz ont jamais esté vaincus

Doncques nul ny prent avantaige
Tant fust il de grant renommee
J'ay en moy desir et couraige
Que je feray mon personnaige
Si bien a icelle meslee
Que j'auray part a la journee
Et que l'honneur m'en demourra
Ou la charonne y demourra

Quant fresche memoire entendit
A quel fin tendre je vouloye
Moult doulcement me respondit
J'ay ouy ce que tu m'as dit
Ou voulentiers conseil donroye
De parler je t'abuseroye
Mais a l'oeul je te monstreray
Ce que j'entens et que j'en sçay

 


V - Cy monstre fresche memoire a l'acteur les sepultures des anciens trespassez. Et par les escriptures voit ceulx qui ont esté desconfitz par debile ou par accident.

Lors ouvre ung huys et va devant
Et nous mist en une champaigne
Qui fut a sa maison tenant
Le plus plain pays et le plus grant
Qui soit de paris en espaigne
La n'avoit roche ne montaigne
Chascun y peult choisir a l'ueil
Du toutes pars et a son vueil

Ce plain qui fut chose infinie
Estoit paré de sepultures
Chascune faicte et en tablie
Diversement et par mestrie
Tant d'ymages que d'escriptures
Pour congnoistre les creatures
Qu'accident avoit desconfiz
Et par debile les occiz

Lors me dist voy quelz drapperies
Et note le pas de atropos
Cy sont les charongnes pourries
Des grans honnorez en leurs vies
Consumez par chair et par os
Sçavoir le nombre je ne potz
Par art par sens ou retentive
Car c'est chose trop excessive

Au cimetere de memoire
Trouveras et ne l'oublie mie
Enfouyz par le territoire
Ceulx dont la bible fait hystoire
Exceptez enoc et helye
Qui de la puissance infinie
Et pour fournir ce qu'il doit estre
Sont mys en paradis terrestre

Les gens de quoy escript omere
Sont posez en ce cymitere
Tous ceulx dont recite valere
Et de qui tulles rend mistere
Et dont oroze fait matere
Tous sont pourriz les corps en biere
Tous en la terre transgloutiz
Et prins comme a elle lotiz

Accident fiert debile assomme
Atropos leur livre la place
Ilz n'espargnent femme ne homme
Tous mettent affin c'est la somme
La mort tousjours prent et enlace
Et qui par nature se passe
Et luy dessire son habit
Dont elle a douleur et despit

Ceulx qui firent ja les grans faitz
En babilonne la cité
Les clercs d'athenes tant parfaitz
Les troyans dont on fait les laitz
Et dont on a tant recité
Chascun d'eulx a la mort cité
Et les amazones armees
Sont toutes a la mort livrrees

Et tout l'ancien testament
Peulx cy savoir voy cy le livre
Mais pour goutter plus fermement
Veez cy ou ceulx du temps present
Sont mys pour les premiers ensuyvre
Lys et retiens et si te mire
Cy sont ceulx que mort oppressa
Depuis l'an trentecinq en ça

Lors me mist ainsi qu'a costiere
Et veiz bien par les sepulcres
Qui furent de neufve matiere
D'aultre façon d'aultre mistere
Les armoyries les figures
Par les habitz et escriptures
Que les mors ou je me trouvoye
Furent du temps que je vivoye

La eut epitaphes sans nombre
Dont oncques n'en congneuz les corps
Si m'en tais pour fuyr encombre
Puis l'ame assista et fist umbre
Et me monstra de plusieurs mors
Les tumbes dont j'ay par recors
Fresche memoire plus que assez
De ceulx de mon temps mors et trespassez

Ainsi entray en celle forge
Dont atropos menoit l'ouvraige
La veiz ung seigneur de saint george
Que debile print par la gorge
Et vinquit par son vaisselage
Il fut tenu et grant et saige
Entre tous ceulx de son quartier
Mais il est mort pour abregier

Je mys l'ueil sur ung empereur
Filz de puissant roy de bahaigne
Sigismond prince de valeur
Hardy et vaillant deffenseur
Du grant empire d'alemaigne
Debile qui maint en meshaine
La mort a batu et maté
Maulgré empere et royaulté

La je veiz de ligny le conte
Que de luxembourg se nommoit
Des vaillans fut dont on racompte
D'accident oncques ne tint compte
Et tousjours a luy combatoit
Mais debile qui l'ettendoit
Au pas pour en prendre vengence
L'occist a petite deffence

La gisoit ung portinglois
Duc de conymbre filz de roy
De grans vertuz en tous endroitz
Prince vaillant saige et courtoys
Plus renommé de luy ne voy
Mais au milieu de son arroy
Accident par mortelle envie
L'occist et luy osta la vie

Tout subit si gettay mon oeil
Sur ung cercueil de pierre dure
Ou gisoit mort loys du bueil
Qui bien valoit qu'on en fist dueil
Et qu'il fust plainst oultre mesure
Accident par malle aventure
Faisant armes le fist mourir
Ou plus bel de son adventure

Deux papes dessoubz ung tombel
Je veiz la felix et eugene
Ceulx firent ung cisme nouvel
Chascun pour faire son plus bel
Voult estre pape et avoir regne
L'eglise en douleur et peine
Mais debile les mist en terre
Et fist la fin de telle guerre

La veiz deux anglois capitaines
Estre pourriz et consumez
En france ont eu bruyt et grant regnes
En guerre firent de grans peine
Et furent doubtez et aymez
Thaleboth et scalles oultrez
Furent par accident tous deux
Et furent ilz cent foys plus preux

La fut que je regretay fort
Par ces epitaphes escriptz
Mis gilles de bre(taigne mort)
Par accident qui luy fist tort
Et pres de luy haultement veiz
Par debile mort et occis
Le duc arthus plain de vaillance
Qui fut connestable de france

La fut ung jacques de bourbon
Roy de naples moult a priser
Le monde ne luy sembla bon
Si voua la religion
Et fut observant cordelier
Mais debile pour le monstrer
Pour par royalle dignité
Ne l'a de la mort respité

Soubz une tombe de laton
Trouvay ensevelliz deux corps
Dont fut honneste l'edicion
Cevely furent hyre et pothon
Des bons guerroyers du temps lors
Des mains de debile sont mors
Maulgré leur bonne renommee
Qui leur est aumoins demouree

Ung sepulchre assez noble et riche
Je trouvay sur ung allemant
Ce fut le duc aubert d'ostriche
Celluy ne fut aver ne chiche
Mais prince treslarge et vaillant
Accident luy vint au devant
Qui l'occist par son vaisselage
Se que l'en tint a grant dommaige

En ce lieu cy ne failloit mye
D'estre bien mengé de vermine
Le roy lancelot de hongrie
L'un des grans de la germanie
D'estre ung empereur bon et digne
Accident le print en haine
Et l'occist par piteux exploitz
Au grant diffame des pergois

J'aperceuz ung chevallier bon
Qui ja fut oultré par debile
C'est le seigneur de varembon
Et pres ung homme de renom
Qu'accident meurdrist entre mille
Ce fut le seigneur d'esmavile
Devot vertueux et vaillant
Son nom fut jacques de chaillant

La gisoit soubz sepulchre hault
Ung chevallier mort en ce plain
Natif du pais de henault
Dont le los retint qui moult vault
C'est messire jacques de lalain
Vingt et deux fois tout de sa main
Arme ains trente ans acompliz
Et l'a accident a mort mys

Accident qui de vaincre soigne
Avoit fait pourrir en ce pré
Ung que je dois mettre en besoigne
Cornille bastart de bourgoigne
Chevallier preux et asseuré
A son escu qui fut barré
Parmy lyons et fleurs de lys
Congneuz le chevallier de pris

Boexe seigneur de la varenne
Grant seneschal de normendie
Gisoit mort en celle garenne
Plat ou sablon et en l'arenne
Comme la commune mesgnie
La fut sa vaillance affoiblie
Son sans et son plaisant parler
Car accident le fist finer

Je congneuz deux ducz de millan
L'un fut philippes maria
Mort et infect a son grant dam
L'escripvain n'y eut pas mys l'an
Et pres couchoit et reposa
Celluy duc qui millan gaigna
Le duc franusque duc d'escosse
Debile les occist par force

La veiz thibault de neuf chastel
Ja de bourgoigne mareschal
Son nom et tiltre furent bel
Pieça n'eurent bourgoignons tel
Car il estoit hardy vassal
Chevallier fut preux et loyal
Debile en fist la place nette
Par la mort qui emporte sa debte

De faulbourg le conte la gut
Et trois freres de tholongon
Chascun d'eulx homme vaillant fut
Mais debile si les deceut
Et les desconfist sans rançon
Ceruant le chevallier de non
En sens et proesse acomply
Gisoit la mort ensevely

Je rencontray en mon chemin
Ung cercueil de grant artifice
Ou fut le chancellier Rolin
Son tiltre qui fut en latin
Le monstroit parfait en justice
Sumptueulx fut en edifice
Hospitaulx et moustiers fonda
Et puis par debile fina

Ung grant prince devenu riens
La gisant si non cendres et pouldres
C'est le duc charles d'orliens
Ou tant eut de bonté et de biens
Qu'on ne le peut nombrer ne souldre
Et aprés que dieu vueille absouldre
Fut de dunoys le bon seigneur
Des deux fut debile occiseur

Croy conte de poursuan
Mort ou les aultres ne trouvay
Du bon duc fut du chamblan
Son frere l'alloit poursuyvant
Jehan jadis conte de chauvay
Vertueux furent je le sçay
Et chevaliers renommez
Mais debile les a tuez

Ung corps qui fut grant de haultesse
Je congneuz la soudainement
Le roy Alphons plain de proesse
De grant estat et de largesse
Et vault le ramantement
Maulgré son ost et sa grant gent
Debile prinst sur luy sa reste
Ou plus fort de sa grant conqueste

Je trouvay sautez charny
Et mains de l'ordre de thoison
Habourdin la vire crequi
Molembaix bruneau et aussi
De la lain messire symon
Roys ducz contes a foison
Tous mors sont en champ et en ville
Par accident ou par debile

La furent en la terre mys
Deux hommes de grant apparence
L'ung fut cosme de menicis
Et jaques cueur ceulx ont acquis
Et mys ensemble grant finance
Mais n'y vault ne or ne chevance
Debile qui tout vainc et tue
Les assomma de sa massue

Je mys l'ueul sur deux connestables
Sainct pol et alvre de la lune
Puissans furent et redoubtables
Chevalleureux et honnorables
Chascun eut part de sa fortune
Accident leur monstra rancune
Et les fit mourir et finer
Au plus hault point de leur regner

Valerain seigneur de morueil
Gisoit par les lames piteuses
Mort estandu en son cercueil
Et auprés que oublier je ne vueil
Touchoit le seigneur de saveuses
Pour leurs oeuvres chevalleureuses
Debile le tresgrant ouvrier
Ne les voulut de mort espargnier

Varonic qui tant eut de puissance
Ja congneuz a la rouge croix
Se feiz je le duc de clarence
Accident les mist en oultrance
Et occist deux nobles anglois
Plus bas gisoit ung escossois
Contre de glatz en pourriture
Despeschié par telle adventure

Vergy couches et brederodes
Veiz gisans dessoubz les sentiers
La congneuz a l'abit et modes
Des grans du prince de rodes
Mains bons et vaillans chevaliers
De caleraues et de templiers
Mont trouvay mors par accident
Et par debile qui tout fent

La gent des marches de turquie
Ung bon chevallier de grant fait
C'est le blanc de la volaquie
Sur les turcs fist mainte saillye
Moult de proesses y a fait
Debile l'a du tout desfait
Et abatu sans relever
Celluy qu'on doit bien honnorer

Charles duc de bourbon je veiz
Par debile mort et maté
Et pres de luy deux de ses filz
Furent d'accident mors et pris
Dont dommaige fut et pitié
L'un fut de beau Jeu herité
L'autre jacques qui fut puisné
Chevallier de moult grant beaulté

La veiz le prince d'antioche
Qui eut des chippres l'eritiere
Contre accident il ne tint coche
Mais l'enfouyt tout d'une approche
Au milieu de telle maniere
Debile par aultre maniere
Eut la mort de mortelle prince
Loys qui fut d'orenge prince

La gisoit mort sur ung pesac
Ung grant prince ou j'allay le cours
Si fut le conte d'armegnac
Grant mal me fist a l'estomac
Et me fist rendre plains et plours
Aussi le bon duc de nemours
Trouvay par accident finé
Et en ce cymitere enterré

La fut de sicile le roy
D'onneur le droit fruyt et vray arbre
Debile l'occist par derroy
Et si veiz mort en ce terroy
Gisans soubz ung tumbeau de marbre
Deux de ses filz ducz de calabre
Moult vertueux et renommez
Par accident mors et tuez

La gisoit ung roy d'angleterre
Henry qui fut plain de simplesse
Son escript monstroit a l'enquerre
Qu'il ne fut pas homme de guerre
Ne prince de grant hardiesse
Il fut de tresroyal haultesse
Mais accident qui tout desrune
Luy donna trop malle fortune

Je trouvay soubz grant apparence
Gisant mort la noble personne
De charles le grant roy de france
Septiesme du nom d'excellence
Qui moult esleva sa couronne
Sa fin fut vertueuse et bonne
Debile en fut le droit meurdrier
Comme d'un simple chevallier

Le duc de guyenne choisy
Gisant tout mort en my la voye
Par accident qui l'eut saisy
Et de telle mort ou quasi
Son nepveu le duc de savoye
Le duc jehan que je regrettoye
De cleves veiz la mort gesir
Que debile avoit fait finer

Tout hors du terroyr crestien
Veiz qui tous aultres passa
En tous triumphes sans moyen
C'est ce turc et puissant payen
Qui douze regnes subjuga
Et deux empires conquesta
Grant fut ce mahommet banny
Mais debille l'a esbahy

Se mathussalle devoye
Qui vesquist plus de neuf cens ans
Et plus que tousjours j'escripvoye
Les mors qu'en ce lieu je trouvoye
Si me seroit petit le temps
Si prendront en gré les lisans
Chascun en peult assez penser
Et n'est besoing de leur nommer

La veiz gesir dessoubz les lames
Par nombre non a estimer
En derrieres roynes et dames
Duchesses contesses et femmes
Tant qu'on ne les sçavoit nombrer
Je me passe de les nommer
Mais beaulté haulteur ne vertu
Ne a contre la mort rien valu

Les evesques et bonnommeaulx
Les papes et simples convers
Les mendians les cardinaulx
Patriarches et peres chaulx
Tous sont la gisant a l'enveres
La mort les fait menger aux vers
Et sont leurs os sy tressemblables
Qu'ilz ne sont point recongnoissables

Les empereurs et les coquins
Les mecaniques et les roys
Contes et ducs et gallopins
Les bedeaulx et les eschevins
Povres riches faulz et adroitz
La mort a tout prins a la roys
Et n'en lerra par ses cautelles
Ung seul pour dire les nouvelles

Les converses et les prieuses
Les abbesses et les novisses
Damoiselles devocieuses
Mondaines et religieuses
Possessans et sans benefices
La mort en a fait sacrifices
Toutes a prins toutes prendra
Tout est pourry tout pourrira

Et me dist pour tout reconfort
Fresche memoire pour conclurre
Tu voys les euvres de la mort
Riens ny vault puissance ne fort
Il te fault a cella reduire
Le meilleur ou l'en te peult duyre
C'est de memoire despescher
Du scinderesse de peché

C'est qu'elle dist c'estoit raison
Combien que ce fut fort a faire
Si rentrasmes en sa maison
Ou il eut des biens a foison
Pour nous desjuner et refaire
La dame qui fut de bonnaire
M'a sceust si bien arraisonner
Qui valloit mieulx que le disner

Les choses qu'elle me monstra
Me firent penser a loisir
Tout conclud ce mont s'en alla
Ma dame quant est a cella
Plus ne fault mon penser couvrir
Adviengne qui peult advenir
L'adventure veult approuver
Qu'onques homs ne peult eschever

Lors me dist et je le t'otroye
Et si te menray celle voye
Si demanda son palefroy
Je le meneray et elle et moy
Heureux fuz quant tel guyde avoye
Plustost que dire ne savoye
Tous d'eulx nous trouvasmes sans faille
Ou devoit estre la bataille

A l'approucher j'ouyz l'effroy
Grant tourbe de gens et murmure
Coups ferir comme a ung tournay
Voulentiers fusse retournay
Pour eviter telle adventure
Ung perron devant la closture
Trouvay a grans lettres dorees
Ou j'ay telz parolles trouvees

Cy fine le chemin mondain
Cy fine la sante de vie
Cy se fiert le plus inhumain
Dont atropos juge soudain.
A le pouoir et seigneurie
Nul n'y entre qui ne desvie
Deux champions a si tresfors
Qu'ilz ont tous les ansestres mors

Accident combat le premier
Peu en attainct qui luy eschappe
S'il fault, lors vient le grant murdrier
Debile prince d'encombrier
Qui tost occist et tost attrappe
Riens ne vault cuyrasse ne chappe
Veez cy la mortelle adventure
Ou prent fin toute creature

Au perron ne feis demeuree
Ains tiray vers les lices closes
Pour ce que je y veiz assemblee
Regardans debat ou meslee
Ou aulcunes estranges choses
La ne fuz minutes ne poses
Que je veiz en son eschauffault
Atropos seoir au plus hault

Atropos d'un habit divers
Fut paré d'estrange maniere
Bendé de couleurs en travers
Dentellé de terre et de vers
Et seant en pompeuse chayere
Contenance monstroit tresfiere
Tenant ung dar de deffiance
Contre tel qui guiere ny pense

 

 


VI - Cy devise de la bataille faicte entre debile et le duc philippe de bourgoigne.

Son mareschal fut cruaulté
Qui me tint des lices l'ordonnance
Son herault estoit voulenté
Portant ung baston tout drappé
De couleurs de mescongnoissance
Son cheval estoit de doubtance
Portant le sceau d'une soucye
En telz armes nul ne s'y fie

Les lices furent de douleurs
Des mains de tristesse charpentees
Le pavillon fut de clameurs
Les bannieres furent de pleurs
Au cousté l'appellant plantees
Et les gardes de deux entrees
Furent je ne l'oubliay mye
Fielle despit et villainie

Le pavillon du deffendeur
Estoit tresrichement bordé
De toute bonté et doulceur
Les bannieres furent d'honneur
Qui moult bien paroyent en ceste
Le herault eut nom bien aymé
Qui portoit blason de proesse
Couronne d'entiere noblesse

Voulenté en place sault
Et fist crier parmy la lice
Que nulz par signes bas ne hault
N'avantaigeast en cest assault
Sur peine que l'on le punisse
Puis affin que l'on se fournisse
Il cria laissez les aller
Chascun pense de se monstrer

Lors saillit de son pavillon
Debile portant deux gisarmes
L'une fut persecution
Et l'autre consummation
Pour le dernier coup et fait d'armes
De sable sur sa cotte d'armes
Qui fut pourtraict et figuré
Ung homme mort et descharné

Et pour fournir ceste besoigne
Le deffendant sault d'aultre part
Vestu de armes de bourgoigne
Honneur le conduist et enseigne
Et ne le laisse tost ne tart
Ce fut celluy ou dieu a part
Philippe duc qu'on ayma tant
Le plus grant des ducz et vaillant

Il tenoit en sa dextre main
Une lance de bon advis
En l'autre je veiz tout aplain
Ung tergon tout paré et plain
De loz de pouoir et d'amis
Et pour le tout estre au vray mys
Sa hache fut de fermeté
Contre l'assault d'adversité

Debile sembloit moult a craindre
Et branloit ung dard de grevance
Monstrant qu'il ne se veult pas faindre
Et s'il peult sa partie attaindre
Il est mort ou mys en oultrance
Le bon duc demenoit sa lance
Et sembloit bien ung chevalier
Qui ne daigneroit desmarchier

Ainsy marcherent fermement
L'un sur l'autre les dessusditz
Debile tout premierement
Gettant son dard griefvement
Et cuida avoir tout conquis
Mais le duc qui estoit apris
Comme ung asseuré champion
Receut le coup a son tergon

De ce coup le duc se deffit
Monstrant chevalleureux devoir
Son gect met avant et partist
Si bien que peu qu'il ne deffist
Debile qui monstroit pouoir
Lors chascun se fist bien valoir
Chascun vouloit estre vaincueur
De la bataille et de l'honneur

Le duc print son bec de faulcon
Qui fut de fermeté cloué
Et debile le tresfelon
Frappa de persecution
Grans coups tous plains d'enfermeté
Chascun eut fiere voulenté
L'un fiert l'autre rabat et maille
En celle cruelle bataille

Memoire monstroit esperance
Que le duc vaincroit la journee
Pour sa tresapre resistance
Dont plusieurs foys fist apparence
Contre accident en la meslee
Mais debile par destinee
Doubtoit pource qu'il fiert et blesse
Des coups qui viennent de foiblesse

Pour savoir d'armes le mestier
S'apprendre on peult a ceste escolle
Si l'assaillant est dur et fier
Le deffendeur est a priser
Se l'un meshaigne l'autre affolle
Hardiment parmy le champ volle
Pour rebaudir les champions
Qui vault d'or trente millions

Tant ont feru et tant maillé
Chascun d'eux sans faire reprinse
Que le plus sain fut meshaigné
Foullé, grevé, et travaillé
Et affoibly en mainte guyse
Mais debile monstra maistrise
Car d'un coup soudain d'un quaterre
Mist mort le noble duc par terre

Aussy fut le noble duc abatu
Dont atropos la forcennee
Pour ce noble prince vaincu
Ne tint non plus que d'un festu
Et ne luy fut q'une rosee
Monstrant qu'elle est acoustumee
Et prent son singulier plaisir
A veoir gens finer et mourir

Lors heraulx comme bien apris
Prindrent ung drap texu de gloire
Et l'ont sur le noble corps mys
Et porté en terre et assiz
Au saint lieu de digne memoire
Ou l'on le trouvera encore
Tant que le monde definera
Ne jamais n'en departira.

 

 

VII - Comment le duc charles de bourgoigne combatit messire
accident.

A peine fut levé le corps
Ou du moins au sepuschre mys
Que j'ouys le bruyt par dehors
De deux ostz trespuissans et fors
Chascun paré de ses amys
Accident le premier je veiz
Qui sur le ranc se vint esbatre
Monté et armé pour combatre

Cheval et bride d'arrogance
Son harnois trempé de courroux
Maleur avoit ferré sa lance
L'espee fut d'oultre cuidance
Dont moins fut batu et escoux
Et pour donner les rudes coups
A son arçon pent une masse
De fortune qui tout amasse

D'aultre part sault ung bourgoignon
Charles qui fut prince doubté
Et ressembloit bien compaignon
Qui vouloit avoir sa raison
Au plus pres de sa voulenté
Son cheval s'appelloit fierté
Et fut armé entierement
D'un harnois fait par hardement

Sa lance fut de haulte emprinse
Grant cueur luy donna son espee
Le forgeur s'appelloit maistrise
Sa dague se nommoit franchise
Pour estre vaincueur de l'armee
Quant j'euz sa façon regardee
Vice je n'y peuz parcevoir
Fors seullement de trop vouloir

La n'eut tente ne pavillon
Ou ses armes furent pendues
Ce fut en l'ombre d'un buisson
Sans bruit ne fut pas ne sans son
L'assembler de ses deux venues
Les lances qui furent agues
Coucherent tous deux d'un desir
Pour trop mieulx attindre et ferir

Accident hurta par despit
Sur le duc a toute puissance
Trois fois son cheval abatit
Dont pourtant ne fut desconfit
Mais eut cueur de sa recouvrance
Ainsi passa le cours de lances
Qui ne fut pas a l'avantaige
De ce duc ne de son bernaige

Les espees furent saisies
Pour mieulx assommer ce debat
La monstra chascun ses envyes
Le jeu ne touchoit que leurs vies
En telz perilz est qui combat
Ayde estremye ne rabat
Ne peult a ce besoing servir
En fin fault ou vaincre ou mourrir

Le duc qui fut vaillant et fier
Mist son corps a toute deffense
Mais accident pour le dernier
Empoigna son baston murdrier
C'est la masse de mal vueillance
Que fortune par excellence
Luy donna pour ceulx desmonter
Qui se veullent hault eslever

Le duc accident rebouta
Jusques fortune vint en place
Dont accident tel coup donna
Que mort a terre tresbucha
Le duc a qui dieu pardon face
De ce maleur je me soulasse
Qu'il mourut pour non faire faille
Dedans le champ de la bataille

Se la guerre fust a louer
Par ung honnorable exercite
Gensdarmes bien devez plorer
Plaindre gemir et lamenter
Le duc charles dont je m'aquitte
Et m'est confort que je recite
Que mon maistre ne fust vaincu
Par nul homme qui l'ait valu

Mais fortune tient en ses mains
Par la tresdivine puissance
Tous les affaires des humains
Tant des mauvais comme des sains
A son plaisir on fiert et lance
Car du ciel ne de l'influance
De quoy parle aristobolez
Nous n'en savons que par les faitz

Quant on a des bien a planté
Et que le tout vient a plaisir
On se dit de bonne heure né
Et que l'homme est bien destiné
Car il a tout a son desir
Mais s'il est povre au definer
Ou diffamé aucunement
On en juge tout aultrement

Dont qui veult son mal destourner
Selon la divine doctrine
Il nous fault noz cueurs retourner
Vers celluy qui tout fait tourner
Qui la lune croist et decline
C'est cil comme dit le proline
Qui au secret de ses ydees
Se joue de noz destinees

Ainsy eut accident victoire
Sur ce prince fier et puissant
Il vivra en noble memoire
Et sera nommé en hystoire
Le duc charles le tresvaillant
De luy nous cesserons a tant
Et reviendrons par pons et pas
A ce qui advint en ce pas

Accident se voulut arrester
Pour attaindre nouvelle proye
Et se fist de nouvel armer
D'un harnoys fait de deseper
Affin que de loing on le voye
Aprés se tint en my la voye
A tout ung glayve de mesure
Que l'on nommoit malaventure

Ung poingnart met a son costé
Fait de soudaine maladie
Mains en a occis et tué
Et pour avoir le champ oultré
Et plus tost vaincre sa partie
De secrete melancolie
Avoit une dague affillee
Qui mainte personne a tuee

La estoient menestrelz clerons
Harpes tabourins et vielles
Orgues et manicordions
Faisans aubades et grans sons
Tout triumphoit au som d'icelles
Chascun couroit a ces nouvelles
Chascun demandoit que c'estoit
Car la matiere le valloit

La veiz venir une lictiere
De deux licornes soustenue
Dont l'une fut bonté entiere
Et l'autre fut doulce maniere
La plus qui fut oncques congneue
Toute d'or se monstroit a veue
La lictiere et le parement
Qui cousta merveilleusement

Les deux licornes par le frain
Quattre grans princes demonstroient
Fleur de jours fut le premerain
Au bon renom qui n'est pas vain
Ces deux la premiere memoire
Les aultres deux qui suyvoient
L'un fut noble cueur sans envie
Et desdain contre villainie

Apres suyvoit grant baronnie
De dames a grant quantité
Chascun triumphoit a l'envie
Moult fut belle la compaignie
Et de richesse et de beaulté
Or est temps d'avoir raconté
De la lictiere le droit veoir
Qui vault bien le rementevoir

 

 


VIII - Comment accident combatit la duchesse d'ostriche, et elle vaincue l'acteur se voulut presenter pour faire son devoir Et comment atropos l'envoya contremander par respit son herault.

La seoit en magnificence
Une princesse toute armee
Qui venoit pour prendre vengence
Du grief et de la desplaisance
Que ce pas luy avoit donné
Celle sembloit panthasillee
Qui vint la mort de hector vengier
Mais elle le compara chier

Son harnoys fut fat de plaisir
Et luy donna bonne pensee
Son bassinet pour garentir
Tout ce qui pouvoit survenir
A l'assault de celle meslee
Elle eut une trenchant espee
Nommee desir de bien faire
Pour mieulx grever son adversaire

Ung gavelot eut pour getter
Qui se nommoit plaisant racueil
Et le tergon pour soy garder
S'appelloit loyaument aymer
Sans changer ne de cueur ne dueil
Et puis que oublier je ne vueil
Sa cotte d'armes j'apperceuz
Plaine de cent mille vertus

La dame de son bon gré sault
Preste d'accident rencontrer
Et fist publier au plus hault
Par loyaulté son bon herault
Veez cy qui se vient presenter
Au jour qu'on luy fist assigner
C'est d'ostriche la vraye duchesse
Qui veult tenir foy et promesse

Quant accident veit sa partie
En telle beaulté et valeur
S'il eut peur je n'en doubte mye
Doubtant son emprinse faillye
Et qu'il n'en saillist a honneur
Je veit grant pouoir et hault cueur
En vingtz et quattre ans seullement
Cela l'esbahit durement

Mais forcené son conseillier
Luy dist te fauldra le couraige
Jeune arbre peult on bien ployer
Jeunesse se peult esmayer
Par fermeté et par usaige
Et si trouveras par usaige
Que qui l'assault de maladie
Morte est tost qui n'y remedie

Accident honteux sault avant
Comme cil que despit argue
La dame luy vint au devant
Lors la navra soudainement
D'un gect de fievres continue
De coup l'avons nous perdue
Helas de bourgoigne marie
Qui laissa mainte ame marrie

Accident cruel et felon
Par ce meurdre desordonné
a robbé le palladion
Le fort la benediction
Soubz qui la bourgoigne a regné
Ce nom est failly et finé
Au trespas de la bonne dame
Je prie a dieu qu'il en ait l'ame

C'estoit pour nous le troyllus
Dont troye fut reconfortee
Qui les troyans a soustenuz
En couraige et en grans vertus
Plus hector en longue duree
Car celle nous fust demouree
En nous estoit de soustenir
Ce qui nous pouoit advenir

O vous qui ce livre lisez
Pensez bien a ceste adventure
En ce beau mirouer vous mirez
Car ce trespas vous passerez
Beaulté deviendra pourriture
La mort guerroye de nature
A charger et mener affin
Son ennemy et son affin

Et peult chascun lisant entendre
Que ce m'est desplaisance dure
De veoir mors et en terre estendre
Iceulx trois a qui je dois rendre
Amour foy hommaige et droicture
Car soubz eulx j'ay prins nourriture
Ilz m'ont nourry et eslevé
Qui ne doit pas estre oublié

Quant je veiz la bataille oultré
De ceulx a qui subget je fuz
J'ay toute crainte despitee
Sy ay ma visiere baissee
Com cil qui ne veult vivre plus
Sans craindre qui me coure sus
A chascun en donnay le chois
Qu'a tous deux a une foys

Fresche memoire me disoit
Qu'a dieu je me recommandasse
Chascun ne fait pas ce qu'il doit
Car qui sent le cueur en destroit
La reigle de raison tout passe
Sy me mys en renc et en place
Pour l'assault d'accident souffrir
Ou debile s'il veult venir

Mais il vint ung herault petit
Qui portoit ung blason d'attente
Son nom fut en arme respit
Doulcement me parla et dist
Amys donnés a moy entente
Atropos qui droit cy regente
Vous mende que vous departez
Jusques a ce que mandé soyez

Respit qui n'est pas des plus grans
Me fist departir et retraire
Car atropos en celluy temps
Avoit assez de combatans
Et me fault sa voulenté faire
Fresche memoire de bonnaire
Que tant je trouve amoureuse
Se monstra de ce mot joyeuse

 

 

 

IX - Comment freche memoire ramaine l'acteur en sa maison et
luy devise en chemin de ses nouvelles.

Et conclud qu'il me meneroit
Au lieu ou trouvé je l'avoye
Et qu'entendement m'aideroit
Qui moult bien me conseilleroit
Pour les armes que aprins avoye
Ainsy nous maismes a la voye
Pour aller en sa demourance
Par le doulx chemin d'allegance

Memoire qui me veit muser
M'entretint de beaulx ditz et comptes
Moult bien luy seoit le parler
Le chemin me fist oublier
Et me dist entre ses racomptes
Je sçay roys ducz barons et contes
Sepulturez nouvellement
Depuis nostre departement

Loys filz du duc de bourbon
Evesque du liege tant digne
Conte du loz duc de buillon
Du royal sang prince tant bon
Qui de parens eut une mine
Accident qui la vie mine
L'a n'a gueres mort et tué
Au fort de sa meilleur cité

Le conte de chunay tant saige
Tant plaisant et tant estimé
Tant agreable personnaige
Tant de vertuz eut en partaige
Que de chascun fut desiré
Accident l'a mort et maté
D'une fievre soudainement
Avant qu'on sceust savoir comment

De luxembourg le conte pierre
Qui six foys conte se nommoit
Accident luy a fait la guerre
Et alla debile requerre
Car jeune matiere vouloit
Ces deux l'ont mys en tel destroit
Par maladie decrepite
Qu'ilz en ont fait le monde (quitte)

Edouart le bel roy angloys
Chevallereux et renommé
Qui fut estimé des francoys
En crainte tint les escossois
En son royaulme redoubté
Accident l'a a mort bouté
Subit d'une fievre soudaine
Comme du traict d'une dardaine

Phebus jeune roy de navarre
Qui chascun si fort estimoit
Accident qui trop voult conquerre
A rompu comme ung petit voyrre
Sa vie qui tant florissoit
L'un deffait et l'autre deçoit
Et a le dard si tres a dextre
Que nul n'en sceut oncques seur estre

Michiel de berghuez tant vaillant
En jeunes jours plain de prudence
De cent ans ne cent devant
Tel chevallier n'eut en brebant
Pour garde vertu et vaillance
Accident a rompu sa chance
L'an de sa vie vingt et six
En combatant pour son pays

Ainsy memoire m'entretient
De motz saiges et a planté
Et me fist comptes plus de vingt
Qui valoient qui bien en souvint
Et que chascun soit bien noté
Subit trouvasmes son hosté
Ou nous fusmes bien recueilliz
Logez a souhait et serviz

Memoire promptement manda
Le bon hermite souverain
Entendement qui ne tarda
Mais fist ce qu'elle commanda
Et vint comme prompt et soudain
Avant le jour le lendemain
C'est cil ou l'en peult conseil prendre
De tout ce que l'en veult comprendre

Dont me fut donné par conseil
Entendement que moult j'aymay
Jamais je ne veiz son pareil
Pour donner de confort resveil
Plus prudent nulle part ne sçay
Et au grant affaire que j'ay
Je croy que dieu si le m'envoye
Pour le reconfort de ma joye

 


X - Comment entendement enseigne l'acteur a se conduire en fait d'armes et comment il se doit armer et parer.

La s'assist sur une chayere
Le preudhomme devant mon lyt
Son parler sa belle maniere
Je l'eu tant agreable et chiere
Que je n'euz oncque tel delit
Entendement commence et lyt
Leçon ou l'en peult moult apprendre
Qui le veult ouyr et entendre

Amys qui veult en lice entrer
Qui est bataille perilleuse
Tout premier il doit bien penser
S'il a corps pour le fait porter
Contre sa partie hayneuse
C'est une esprouve tresdoubteuse
Tempter dieu, est deffendu
Par le saint canon de vertu

Bien est vray qui est assailly
Et de son droit fort oppressé
L'on tiendroit celluy pour failly
Lasche recreu et deffailly
Si le gaige n'estoit levé
S'aultrement il n'estoit prouvé
Sur ce moult belle usance tint
Le saige roy charles le quint

Mais ton fait c'est ung aultre chose
C'est une batalle commune
A la fois fait en lice close
Ou selon qu'atropos propose
En plain champ sans closture aucune
Soit en plain jour ou a la lune
Riens n'y vault respit ny attente
Payer fault a la mort sa rente

Puis que c'est ung faire le fault
Et que le jour brief tu attens
Pour doubte qu'il ny ait deffault
Preparer et armer te fault
Sans prendre jour ne nuyt ne temps
D'estre bien armé tu pretens
Il te fault avoir repentir
L'armurier de divin desir

Pieces si souldees te fera
De tel art et de tel trempeur
Que vice n'y attachera
Ne jamais peché n'y prendra
Pour faire sur ton corps greveure
Ung harnois te fault de mesure
Fait d'assier de ferme propos
D'aymer dieu pour vivre a repos

De force pren tes brasselletz
Que l'on dit magnanimité
Et pour estre pompt en telz faitz
Avoir te convient gantelz
De charitable voulenté
D'un bassinet soyez armé
Fait des mains de dame attrempance
Qui vault plus que l'homme ne pense

Cuissotz et braconnier de malla
Te fault de chasteté parfaicte
Et affin que l'homme mieulx vaille
Avoir te fault et n'y fay faille
Grenes de tresbon labeur faite
Et pour faire chemin et traicte
Solerez te fault une paire
De diligence de bien faire

Tu te doibs couvrir et parer
De tes armes escartellees
Qui vallent qu'on les doit porter
Celles sont a les blasonner
De foy et de bonnes pensees
Et si doivent estre drappees
Pour monstrer seigneurie acquise
Du saint baptesme de l'eglise

Or es tu armé et paré
Comme a champion apartient
Mais pour plus estre redoubté
Il te fault estre embastonné
Ainsi te fault et le convient
Il ne pert pas temps qui retient
Les bastons te pense bailler
Dont tu as le plus grant mestier

Entendre te fault et savoir
Que qui combat de bon couraige
Il a faculté et pouoir
D'estre a pié ou cheval avoir
Chascun selon son avantaige
Mais pour commun droit et usaige
Combatre a pié est plus honneste
Que soy fier en une beste

Et si peult telz bastons porter
Chascun comme il a de plaisir
Gysarmes ou marteaulx de fer
Haches et lances pour bouter
Ou de guet lancer ou ferir
Ainsi te peult a choiz garnir
Si prens bastons de tel valeur
Que mieulx en vaille ton honneur

Celle franchise signifie
Et se doit en ce point noter
Que dieu par bonté infinie
Nous a donné avec la vie
Le franc arbitre de regner
Et pouons venir et aller
Par la voye de sauvement
Ou le sentier de dampnement

Quant a ce que conseil je donne
En cheval ne prendre asseurance
Il s'entend que nulle personne
Soit d'aulcun bien fait ou aulmosne
Ne doyt prendre en aultruy fiance
Chascun pour soy si songe et panse
Esperant que les heritiers
L'oublieront assez voulentiers

Tu peulx demander advoué
Pour tenir pour toy lieu place
C'est le saint baptesme voué
Qui ne soit pas desavoué
Pour quelque chose que l'en face
C'est cil qui esbahit la face
De l'ennemy entierement
En faisant vivre seurement

Et puis pour tes armes fournir
Tu prendras lances pour getter
Ferrees de devot desir
Le fust sera de souvenir
De la mort que dieu veult porter
Et si fais une dague ouvrer
Tel qu'el morde bien et picque
De la saincte foy catholique

Or as la lance en la main dextre
Pour injure a l'ennemy faire
Targer te fault en la senestre
Pour plus seur de ta personne estre
Qui sera de bon exemplaire
Et fault et est necessaire
L'espee trenchant de justice
Celle te sera moult propice

Or n'a plus qu'attendre a targer
Au temps pour faire les apprestes
Repentir sera l'armeurier
Fais luy diligemment forgier
Tes pieces pour estre plus prestes
N'espargne avoir contant ne debtes
Prens en soing ce n'est pour moy
Car nul ne combatra pour toy

En ce point me sollicitoit
Entendement par la raison
Et mes apprestres conseilloit
Comme celluy qui moult doubtoit
De perdre le temps et saison
Et me dist par comparaison
Le surplus a le double entendre
Car il fault s'armer et deffendre

Je luy demanday plus avant
Or sont mes pieces ordonnees
Mon harnois et mon parement
Tout se fait ordonnement
Mes besongnes sont preparees
A quoy convient temps et journees
Car tout n'est forgé a ung jour
Que dois je plus faire en ce jour

Entendement me respondit
Amys tu fais demande bonne
Ce n'est pas tout que de l'abit
Il fault labourer a prouffit
Pour la santé de ta personne
Si te conseille et le t'ordonne
Que tu rendes travail et peine
D'estre legier et en alaine

Tu te dois le matin lever
Et estouper et nez et bouche
Courir montaiges et ramper
Pour menger et beaucoup jusner
Peu dormir sur luy et fut couche
Estre chaste ce point te touche
Fouyr venimeuse pensee
Et avoir la langue attrempee

Et dois ung haubergon d'assier
Pesant trente livres porter
Tes soles de plomb renforcer
Affin que soyes plus legier
Au harnois que tu doibs armer
Et dois ung gros baston plomber
Pesant maniere et tenir
Pour plus delivre devenir

Souvent tu te dois esprouver
A gens fors subtilz et puissans
Pour soustenir et rebouter
Tout ce qui te pourroit grever
Et pourvoir aux accidens
Telz assaiz sont asseuremens
Contre le froit qui pourroit poindre
Quant on doit son ennemy joingdre

Telles doctrines et aprises
Ne sont pas sans raison fondees
Mais sont par experimens prises
Et par necessité requises
Pour les doubtes estre portees
Et sont figures figurees
A entendre legierement
Pour prendre bon gouvernement

Estouper la bouche et le nez
S'entent que l'en ne doit sentir
Ou goutter nulles vanitez
Mais fouyr les mondanitez
Qui veult a victoire venir
Et le pesant haubert vestir
Nous donne la signifiance
De porter faiz de penitence

Et devons courre au confesseur
Par trescontrite voulenté
Pour nous mondifier le cueur
De tout peché de tout erreur
Et que riens ne soit oublié
Et ce qui sera ordonné
Pour la penitence estre faicte
Soit brief par bon espoir parfaicte

Les assaulx et les appertises
Qui se font pour toy adresser
Ce sont les devotes aprises
Qui sont pour batailles requises
Contre le souldaier d'enfer
Doncques dois tu continuer
A macter la chair perilleuse
Par mener voye vertueuse

Tu ne doibs sans bon conseil estre
C'est adire clercz et docteurs
Qui sont fondez comme on doit estre
En foy et en la saincte lettre
Venans des saintz et des acteurs
Telz sont les saiges confesseurs
La peult on apprendre science
Pour deffendre la conscience

Se tu peulx ma leçon comprendre
Mettre en euvre et l'executer
Tu digne pour l'art apprendre
Pour la grant cité de dieu prendre
Et pour les sains cieulx escheller
Pour lucifer vaincre et mater
En gaignant s'ainsy te conduys
Le hault siege de paradis

Sire diz je moult grant confort
Me donnez et qui bien m'agree
Mais maintenant vient le plus fort
Et qui moult me point et me mort
En souvenance redoubtee
Quant j'auray fait au champ entree
Comme me dois je gouverner
Le point vault bien le demander

Ta question est bien causee
Et demande par ton advis
Car sur toy seul tumbe l'armee
Tu n'auras nulz a ta souldee
Qui pour toy voulsist estre mys
La faillent parens et amys
Confort tu n'auras en tes faiz
Fors seullement de tes biens faiz

Avoir te fault ung pavillon
Qui soit mys en veable lieu
Ung escu par devocion
Ou soit la presentacion
De la vierge mere de dieu
Ainsy te monstreras en lieu
Comme champion de haulteur
Qui combat pour le createur

Et pour entrer en telz destroiz
Il te fault une bannerolle
Qui sera faicte de la croix
Pour te servir deux fois ou trois
Contre charme sort ou parolle
Aprens et retiens mon escolle
Et je t'asseure par moy croire
D'avoir ta part de la victoire

Foy et moy a te faire adresse
Requerras pour te conseiller
Nous deux te tiendrons en proesse
En ferme cueur et en haultesse
Sur tous nous te pouons aider
Ung siege pour te soulagier
Et reposer t'est necessaire
Qui soit paré de satisfaire

Et present en faisant serment
Sur le messel et sur le livre
Jure que volentierement
Tu as prins le baptisement
Pour chrestien mourir et vivre
Et que ton corps presante et livre
Pour soustenir ceste droicture
Contre l'ennemy de nature

Car ta partie jurera
Et vouldra soustenir en somme
Qu'adam que premier dieu fourma
A la mort tous nous obligea
Par la morsure de la pomme
Et que le filz de dieu comme homme
Mesmes en paya le peage
Pour racheter l'humain lignaige

Tu orras crier et deffendre
par les quatre coings du champs clos
Que nulz sur paine de mesprendre
Sur doubte de la vie de offendre
A la voulenté de atropos
Par signes parolles ou motz
Ne donnent part ne avantaige
A ceulx qui combatent ce gaige

Puis qu'il fault que sur ce responde
Les apostres n'ont ilz presché
Par les quatre pars de ce monde
Que nul ne s'attende ou se fonde
D'estre franchement despeché
Par aultruy main de son peché
Et que chascun pour son plus beau
Prendra le faitz de son fardeau

Garde toy bien et je le vueil
Quant pour combatre marcheras
Que tu n'ayes soleil a l'ueil
De tresgrant destourbier et dueil
Par ce faire te garderas
C'est adire que ne mettras
Le soleil de divine essence
Contre toy pour luy faire offence

Le juge tu honnoreras
En obeissant entierement
Ce dieu a qui tu te rendras
Et ses commandemens tiendras
En croyant en luy fermement
La est le seur affermement
Celluy te tiendra en seurté
En contre toute adversité

Et se tu te trouves surprins
Ou en effroy comme il peult estre
Pour avoir mieulx ton sang reprins
Pense que dernierement veiz
Ton dieu entre les mains du prestre
C'est le createur c'est le maistre
C'est cil ou on doit retourner
Pour tout le saint sens asseurer

Mais que jesucrist on n'oublie
L'on ne pourroit estre vaincu
Car l'escripture certifie
Loyal perpetuel de vie
Se l'on a loyaulment vescu
Ce mot note bien, l'entens tu
Il n'est pas mort qui vit et regne
La ou est le glorieulx regne

Au partir marche doulcement
Monstrant voulenté asseuree
Mais aborde robustement
Deffens fort assaulx vivement
Ne pers nulz coups a la volee
Et si l'ame est trop grevee
Ne t'en esbahis ne soucye
Car tu n'as pas saine partie

Il s'entend que d'umble cremeur
Les sains sacremens recevras
Lors seras de tout point asseur
D'estre le champion vaicteur
De l'ennemy que tu verras
Pour luy tu ne te changeras
Mais demourras sans faire change
Obeissant a ton bon ange

Et se tes bastons peulx tenir
Sans estre brisez ne rompus
Je t'asseure de parvenir
Au bien parfait de ton desir
C'est d'avoir l'honneur de lassus
Retiens je n'en parleray plus
Par me croire tu es sauvé
Ou par contraire condampné

Ainsy entendement faisoit
Grant devoir de moy bien apprendre
Mais savoir ung point me failloit
Qui le fait de mon cas touchoit
C'est de savoir et de comprendre
Le temps qu'atropos vouldra prendre
Ou le jour limite sera
Que combatre me conviendra

Lors me dist que des messaigiers
De par debile me viendront
Pas a pas en plusieurs quartiers
Mais accident a les legiers
Qui peult estre me sur prendront
Dont mes apostres se perdront
Me conseillant que je labeure
D'estre tousjours prest a toute heure

Premier seront les annunceurs
Les yeulx qui besicles demandent
Ce sont des dames espoventeurs
Car nature n'est plus des leurs
Par ce qu'en delinant se rendent
Et bien folz ceulx qui n'entendent
Que le corps fera brief deffault
Puis que la lumiere luy fault

Puis quant les oreilles desirent
Le coton et estre estouppees
Sans oyr ainsi qu'ilz oyrent
Selon que ses deux sens empirent
Ce sont semonces apportees
Ainsy sont trompetes sonnees
A mettre selles sans sejour
Pour aller comparer au jour

Les mains et la teste trembler
Sentiras ce sont seurs messaiges
Qu'il ne te fault plus retarder
Et ne le peulx contremander
Ne replicquer a telz langaiges
Qui penseroit a telz ouvraige
L'on mettroit en dieu sa fiance
Et tout le monde en oublience

Les jambes que soustenu t'ont
Le chair si tendrement nourrie
En leur puissance deffauldront
Et ung baston demanderont
Pour les soustenir en partie
Ce messagier nous brait et crye
Pensez de l'ame par remors
Sans trop obeir a vostre corps

Telz messagiers et telz heraulx
Sons annonceurs de la journee
Avecques moult d'aultres assaulx
Des maladies et des maulx
Dont mainte personne est grevee
Ainsi a sa raison finee
Et me laissa soudainement
Le bon hermite entendement

Quant j'euz entendement perdu
Ou tant de bon conseil trouvay
Je me trouvay tout esperdu
Et ce qu'il me fut advenu
Tout a par moy je recorday
Diligemment je me levay
Pour mettre sus par escriptures
Le droit vray de mes adventures

Dont de la matiere presente
J'ay fait par couplet ce traicté
Lequel j'envoye et le presente
A ung chascun de bonne entente
Non pas pour estre bien dicté
Mais par charitable amictié
Pour faire don et departie
De tresor de mon armoyrie

En la marche de ma pensee
Et au pays d'avise toy
Est ceste queste commencee
Dieu doint qu'elle soit achevee
Au prouffit de tous et de moy
Ce livre je nomme de son
Pour estre de tiltre paré
Le chevallier deliberé

Ce traicté fut parfait l'an mil
Quatre cens quatre vingz et trois
Environ sur la fin d'avril
Que l'iver est en son exil
Et que l'esté fait ses exploitz
Au bien soit prins en tous estas
De ceulx a qui il est offert
Par celluy qui tant a souffert

 

Cy finist le livre intitulé le chevallier deliberé.

Imprimé a Paris par Jehan Treperel demourant a la grant rue sainct jaques auprés sainct yves a l'enseigne sainct Laurent.

L'an Mil cinq cens. Le xix jour de Septembre.

 

 


Olivier de La Marche

 

02 olivier de la marche