Ci dist que Lievre s’assanlèrent
À pallement: si esgardèrent
Q’en autre teire s’en ireient,
Fors de la grêve ù ils esteient;
Car trop furent en grant dolur
D’Omes
è de Chiens orent pour,
Si nes les voleient plus sufri,
Pur ço s’en vorent fors issir.
Li saige Lièvre lor diseient
Que folie ert quanqu’il quereient
A issir de la quenoissance
U il
èrent nurri d’enfance.
Li Autres ne les vodrent creire,
Tuit ensanle vindrent lur eire;
A une mare sunt venu,
Gardent de loin si unt véu
Raines qui furent ensambléez,
De paour d’eaus
sunt effréez,
Dedenz l’iave se vunt plunjier.
Dès quel les virent aprismier.
Uns Lièvres les a appelez,
Segnur, fet-il, or esgardez
Par les Reines que vus véez
Qui poor unt ; vus purpenssez
Que nus aluns quérant folie,
Que nostre grêve avuns guerpie
Pur estre aillurs miex à seurtez,
K’il puissent estre sanz poour,
Ou sanz traveil, u sanz dolour.
