Dist k’uns Aigles vint volant
Juste la mer Peissuns quérant;
Une Welke truva entière,
Mais ne sot en quele ménière
Peust l’eschale despécier,
Kant à son ni dust repérier
Une Cornaille l’encuntra,
Si dist quel li ensègnera
Cum l’Escaille purreit uvrir
S’ele au peissun le lais partir
Puis li rova à munt voler
Tant cum plus halt purra munter;
Qant il sera
munté lassus
Si laist la Welque chaoir jus
Seur dure terre è seur roschier,
Ensi la purra despècier,
L’Aigle aveit grant désirier
Que le peïssun péust mengier,
Hault la
purta, chéoir la lait.
La Corneille fust en agait,
Avant ala, le bec uvri,
Fiert l’Eschaille un po l’ovri;
Le Peïssonet dedans menja
L’Eschalle lait, si s’en ala,
Ainz que li Aigles
fust revenuz
Ne quel se fust aparçéuz;
Le pertuiset si petit fist
Ke li Aigles ni avenist.
Par ceste fable dou Peissun
Munstre l’essanple del’ Felun
Ki par agait è par engin
Mescunseille sun bun veisin;
Tel chose li cunseille à faire
Dunt cil ne puet à nul chief traire;
E qant
il sunt onq mielx ensamble;
Par traïsun li toit è enble
L’aveir que cil a porchacié
Par grant traveil è gaaigné.